羊年到，Lulu祝大家心想事成，好波睇不停。今個新年有歐洲賽、有聯賽，如果你係球迷，相信一定不愁寂寞；不過，拜年時就記得要「專心一致」，同家人歡度佳節，食完開年飯返屋企先專心睇波！
車迷涉種族歧視手尾長
啱啱歐聯差啲未過年就發生「開年」事件，有車路士球迷去到巴黎，竟然喺地鐵站內拒讓一位黑人上地鐵，當中更講出一啲種族歧視說話。事件令兩國都非常關注，車路士同英國都就事件道歉，而車路士亦話如果真係有證有據，唔會反對對呢幾位球迷作出檢控。
雖然件事唔係發生喺球場內，但足球流氓問題，對成個球壇都帶嚟好大影響。據英國警方嘅調查發現，足球流氓嘅行為，大多係心理因素所致，例如家庭關係破裂，有不滿想發洩等等。近年亦有專家指，足球流氓嘅暴行，已經蔓延到網上世界，網上欺凌無時無刻都出現。
實力超班波膽吼3:0
足球流氓問題有好長遠「歷史」，有人會話係足球文化嘅一部份；但足球講嘅，正正係體育精神、互相尊重，而唔係球迷間互相攻擊，就算足球流氓對戰術同歷史再了解、球技再好，但如果連互相尊重都做唔到，實在有違足球精神！
祝願踏入羊年，球壇可以少啲唔好嘅事情，令大家可以繼續享受足球。至於今個星期，就希望大家可以車見車載！講緊當然係車路士（圖）啦！雖然球隊踢完歐聯，但實力始終比般尼好，贏波絕對唔成問題，球隊上場贏唔到，點都要搵對手出一出氣，開到[-2]，贏3:0都唔係好過份呀！
LULU
不懂踢波愛睇波