每次跟港姐出身的文凱玲（Connie）做訪問都會有「驚喜」，上次她為電影《唐伯虎衝上雲霄》宣傳接受訪問時就透露過，為跟周潤發合作拍攝《賭城風雲Ⅱ》，毅然辭去空姐的工作。
Connie日前為《賭城Ⅱ》宣傳，拍照時她又煞有介事拜託攝影師打燈避去鼻樑骨節陰影位。原來她讀書時曾弄斷鼻骨，又有斷腳經歷，儼如成龍動作故事的情節：「讀大學時係曲棍球校隊負責守龍門，比賽嗰日對手甩底，焗咗咁耐咪除低個頭盔透吓氣，點知隊友唔小心，近距離飛咗個波喺我鼻樑，之後送咗入醫院，證實鼻骨斷裂，留醫兩日。」小時候男仔頭一名的Connie，游水、打波、田徑樣樣精，更是跆拳道紅黑帶高手，差一級就升黑帶的她說：「嗰時去考黑帶，我屬於力量型盲打，考完之後發覺右腳好痛，睇醫生先發現有嚿骨碎咗，做咗兩次手術。」
拍得靚唔介意露點
雖然屢次受傷，但Connie樂天的說：「人哋話細路仔行晒啲衰運，大個就唔會再行。」自我開解能力高，Connie自言與大學時主修心理學有關：「有時做嘢唔順利，我都知點樣舒緩情緒。好多朋友有事都會搵我傾。」她笑言還副修過犯罪心理學，或者將來拍戲都用得着。
在拍《唐》片時Connie曾有頗大膽的露背戲份，對於近日袁嘉敏在《鴨王》中露點演出引來不少話題，她表示不抗拒同類型演出：「我唔介意露點，要考慮嘅未必係劇本，女仔其實最緊要係靚，拍得靚就得。」曾經做過空姐的她自言很少被乘客搭訕，她笑指空姐都會有個機師男友，通常只是電影的情節：「咁多空姐邊有咁多機師畀你吖，一般機師都係外籍人士，我會揀中國人做男朋友，至少叫暱稱都可以用中文，親切好多。」
撰文：何永寧
服裝提供：Kir Royal
髮型：Tin Ngai of Hair Corner