今日新春大吉，謹祝各位讀者全年身體健康，四季平安，家庭和睦，財源雖未必滾滾，總是財來有方，長搵長有，生活優游。至於年青人士，祝你地學業猛進考試得心應手，入讀哈耶牛劍兼有獎學金收。
祝願還祝願，最緊要腳踏實地，面對現實，不作無謂空想、幻想，浪費自己青春年華，誤用不正當手段去爭取錯誤目標。
二月十五日，沙田新城市廣場重演反內地客購物事件，秩序混亂，警察見控制不了現場情況，使用胡椒噴霧驅散人群，新城市廣場商店（特別係位於火車站出入口嗰層）大受影響。
新城市廣場平時人山人海，不自今日始，由開業至今，三十年來皆如是，星期六日更加擠逼到水洩不通，左丁山已有十幾年避之則吉，可以唔去就唔去，有一次閒日黃昏時候揸車經過，心念一動，入停車場泊低架車，走上一田買日本水果，但見付款機前嘅人龍，立即知難而退。到樓下餐飲地段，見到比較冷門嘅餐廳Oliver竟然有多人在門口排隊，為之嘖嘖稱奇，新城市廣場果然人流沒法擋，即使冇自由行遊客，行人在內還是要步步為營，以免撞人或俾人撞。
一啲激進組織高舉本土旗幟反對自由行客來港購物，係對一個自由市場現象採取粗暴排外主義手法，唔會趕得走外客，但經BBC一播，會大大破壞香港自由開放嘅國際形象，更反映參與示威衝擊人士嘅知識狹隘，好似跑馬咁，隻馬帶上眼罩，只睇到前面，看不見左右，年青人若然染上香港本土第一，外人唔好嚟嘅認知，全無地區國際視野，在學校讀書幾難成才，在社會做事，何來競爭力？怎可以登上世界舞台！搞本土主義，用一個流行嘅講法，係一個偽命題，根本唔值得花時間討論。香港先天地方細小，無自然資源，後天受1949年後中國大陸政局影響，難民人口大增，加上自然人口增加，今天雖已出生率大降，人口已達七百萬人以上，若非多年來採取對外開放政策，令香港成為金融中心、貨運大港等等等，如何養活本地人口，遑論成為富裕城市？閂埋門香港會有金執？大年初一本應不該如此勞氣，但正是大年初一，新年新開始，希望年輕人立足本土之餘，可胸懷國際，知世界之大，勿做井底蛙。