乙未羊年初一，一言棠向讀者拜年，祝大家洋洋得意，喜氣洋洋，做生意全年旺暢，老中青身體健康。新春佳節除了拜年逛街，睇戲娛樂亦是港人首選，今年賀歲檔期多姿多采，目不暇給，港產笑片賀歲是正路，荷李活大片也要讓路，利是𢭃得豐厚不妨每日睇一套，但花多眼亂究竟揀邊套好？睇戲消遣不涉政治，市民毋須苦惱，一言棠願指點迷路，一次過介紹三部，三「戲」啟泰成年都咁好！
第一部，羊年主題電影，開心幽默又應景，《超級無敵羊咩咩大電影之咩最勁！》由英國動畫《超級無敵掌門狗》、《咪走雞》原班人馬惹笑炮製，黏土公仔造型生動惹笑，羊咩想放假出蠱惑搞到牧場老闆失憶，群羊無首齊齊諗計出城救老細，全片節奏明快溫情洋溢，英式幽默大人細路都睇得開心！
必睇多啦A夢
第二部心水推介《推拿》肯定屬於「黑羊」，發行商推此作賀歲勇氣可嘉，故事講內地一間盲人按摩院內男女之間情慾糾纏與生活，電影帶觀眾用眼「摸索」失明人士內心世界，畫面寫實震撼，主角如秦昊、黃軒等演盲人已可亂真，其細緻演技堪為借鏡，但片中另一亮點是起用六位真正失明人士主演，相較之下他們的真實世故與江湖味又是職業演員鞭長所難及，難怪本身視力障礙的新人張磊憑角色奪得本屆金馬獎最佳新演員。
最後一部是「必睇而且冇得輸」推薦：《STAND BY ME：多啦A夢》，日本首部3D動畫，由《三丁目的夕陽》特技大導演親自操刀，超時空未來世界及竹蜻蜓飛翔穿梭畫面細緻像真，雖然故事耳熟能詳，但全部根據原著多個骨幹情節，由叮噹出現（真係唔好意思，在我心目中呢隻機械貓永遠叫叮噹）到連環大出法寶打救大雄肯定睇得滿足過癮，看着畫面我幾十年前睇《兒童樂園》漫畫的叮噹連載完全忠實湧現，難怪全院無論大人小朋友竟然可以同笑同悲，前後左右成人細路，各有不同笑位和喊位，認真是個特別體驗。新年流流喊苦喊忽？其實畀錢睇戲就要享受到盡，睇戲要隱藏感情宣洩，咁睇條鐵咩！而且應笑應喊同處暗黑環境阿茂理你咩？尤其靜香待嫁前夕父親向女兒依依贈言，以至最攞膽經典場面「叮噹真係要走喇！」忍唔住人之常情，忍得住只係扮有型，無動於衷？檢討下啦。
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周四刊登