談到發哥的電影世界，他坦言訓練班導師鍾景輝對他日後演戲之路影響最深，他說：「最影響我係藝員訓練班導師鍾景輝，嗰陣對演技呢樣嘢認識係零，佢引發到我對戲劇喜愛，演戲細胞條筋俾佢挑起咗。」
發哥的經典作品有不少，而他心目中的經典則是哥普拉的《教父》，最喜歡自己的作品則是與梁朝偉演出的電視劇《北斗雙雄》，發哥解釋：「呢一部係我喺電視台十幾年唯一一部係開工當嬉戲嘅劇，之後嗰啲係受歡迎，但嗰時係完成工作而唔係享受工作，嗰陣《北斗》係返去耍樂，人人都似癲佬咁玩，好開心，嗰陣𡃁仔又冇負擔，𠵱家好多嘢要諗，票房、對手。」問他有否懷念八、九十年代的港片盛世？一向看得開的發哥坦言：「懷念？點會？時間過咗就冇咗，時間只會向前走，一切都係幻象，所以都唔會諗，你仲喺月球，人哋都去咗火星。」
做演員好環保
最後問到發哥，電影除了給他名與利外，他還有甚麼得着？他謂：「死幾廿次都死唔去，好似有幾廿次人生咁囉，死完起身又做過，入咗棺材又彈起身，邊有咁着數㗎，仲有得收錢。我成日話冇乜行業環保得過做演員，循環又循環，𠵱家仲襟用，畀多啲錢又可以（特技）做番後生。」