今日大年初一，唔少歐洲球會都好重視呢個中國傳統節日，羅馬之前已經着咗件印住「拜个早年」嘅波衫，而巴塞亦搵咗沙維、拿傑迪錫等，各自拎住啲簡體字揮春，用普通話拜年。我求大俠就最欣賞曼城，佢哋特登整咗段繁體同廣東話版嘅拜年片段。唔知係咪廣東話易學啲呢？林柏特、占士米拿同迪斯高個個都講得有紋有路，清楚聽到林柏特祝我哋「羊年行大運」。我求大俠之後再聽普通話，佢哋就講到一嚿嚿，要明佢哋講咩，真係仲難玩過獎門人嘅估歌仔。
皇馬亦派出加里夫巴利、沙治奧拉莫斯、莫迪歷等球星寫揮春，寫出「羊年大吉」送畀球迷。曼聯就最認真，整咗個賀年特輯。新一年最緊要和氣，朗尼都明白呢個道理，佢被指喺周一英足盃對普雷斯頓場波插水博十二碼，對方門將史杜文話朗尼已向佢道歉，希望事情可以就此告一段落。
識睇，一定係睇足英台【英波Live】：
http://soccer.appledaily.com
http://bit.ly/engballlive