黃日華的太太梁潔華前年患上急性血癌，農曆新年期間梁潔華要留在醫院接受治療，黃日華和黃芷晴陪伴在側，雖然一家人要待在醫院過節，感覺依然充滿愛和溫馨，經過一年時間完成化療，梁潔華已經完全康復，日前更與芷晴同逛花墟買年花。芷晴透露媽咪對每一個節日都好重視，尤其是農曆新年，梁潔華說：「舊年因為喺醫院，普通食咗餐飯算，今年團年飯會自己煮，一定要食湯圓。」
提到前年急性血癌入院，接受化療，梁潔華笑說：「𠵱家最緊要身體健康，我已經開始返工，一星期返兩日先，老闆想我休息得好啲，但係其實我喺醫院做緊化療嗰時我都係做緊嘢，我同我秘書講叫秘書去，見唔到客咁解，𠵱家可以見番客。」急性血癌留醫仍然熱愛工作，她笑笑口表示華哥和囡囡芷晴不敢遷怒她，只會作出溫馨提示，她說：「提我囉！我做嘢就好投入，啲客OK，好錫我，因為我做管理，要同好多agent開會，嗰時喺醫院不停講電話，𠵱家開會咪好啲，唔使逐個講。」果然是一個工作狂的女強人。
讚芷晴成熟咗
黃芷晴在媽媽梁潔華急病入院初期懵然不知，及後在爸爸黃日華的口中得知，嚇得一驚。黃芷晴剛踏入娛樂圈要全力拼搏，同時又要照顧媽媽，梁潔華大讚女兒在這個艱苦的日子裏成熟了不少，芷晴羊年新希望：「梗係屋企人身體健康先，同埋工作順利，開拍咗個新劇幾開心有六十集，係第一次擔正，初初都好緊張，冇試過講咁多對白，𠵱家都OK！」
採訪：楊潔雯
場地提供：繽紛花藝廣場
