摩連奴麾下嘅車路士經常俾球迷揶揄防守淨係識「泊大巴」，但周二晚嗰場歐聯十六強首回合，車路士三大守衞證明，佢哋仲係一架擅於進攻嘅大巴，三個守將更合力炮製咗個入球幫球隊領先；但係最終大巴穿頂，不斷俾巴黎聖日耳門（PSG）高空轟炸，好彩仲有門將泰拔高圖爾斯力挽狂瀾先守得住，作客同PSG踢成1:1。
今場賽事有唔少球壇嘅重量級人馬嚟睇波，好似有「萬人迷」碧咸、前曼聯領隊費格遜以及巴西教頭鄧加等。起初車路士仲算幾專心防守；但喺三十六分鐘，「後防三子」突然好似變形金剛咁變身，一齊殺咗上前場衝擊。泰利由防守司令變成進攻指揮，喺左路送出一個靚傳中，加利卡希爾喺禁區用後腳助攻，由伊雲洛域一頂入網，幫射門寥寥可數嘅車路士作客領先。
高圖爾斯五度神救
今場車仔嘅防守冇以往咁嚴密。或者係天意一早暗示咗，喺賽前，車路士架隊巴駛入停車場嗰陣，竟然卡咗喺隧道口，搞到架大巴泊唔到車。
車路士今場嘅防守就好似「開篷大巴」咁，俾PSG不斷高空轟炸，伊巴謙莫域及卡雲尼搞到藍軍門前風聲鶴唳。五十四分鐘，馬度迪傳中，卡希爾竟然頂漏咗，其他守將又冇睇實後上嘅卡雲尼，結果畀佢一頂破網，幫PSG追平1:1。今場雙方共有廿三次爭頂，車路士頂贏嘅成功率竟然得三成！
PSG後來更加有反先嘅機會，好彩車路士有門將泰拔高圖爾斯力挽狂瀾，全靠佢喺完場前撲出伊巴一球頭槌，車路士先至保得住和局。泰拔高圖爾斯雖然同夏薩特、米拿拉斯等英超比利時兵受逃稅傳聞影響，但高圖爾斯仍然表現好神勇，今場有五次撲救，可以話係球隊保不敗嘅功臣。
摩佬賽後都承認和得夠運：「我睇番兩位門將嘅表現，就知道我哋係夠運，泰拔高圖爾斯有幾次重要嘅撲救，但考慮到各方面發揮，我覺得PSG係較接近贏嗰隊。」車仔今場拎到一個作客入球，下月喺史丹福橋再鬥PSG。另外，倒戈嘅PSG中堅大衛雷斯今場有段小插曲，PSG一次罰球，球證用「消失的噴霧」畫好罰球點後，雷斯竟出蠱惑，將泡沫抹走，將個波推前。
車迷歧視黑人有手尾
另外，一班車路士球迷賽前搭地鐵嗰陣唔畀黑人上車，仲唱歌話自己係種族歧視，球會即刻發聲明話會嚴懲種族歧視球迷，最重會禁止佢哋踏入史丹福橋球場！
識睇，一定係睇足英台【英波Live】：
http://soccer.appledaily.com
http://bit.ly/engballlive