初三第六場三班1200米，姚廄「火麒麟」初次在港上陣，此駒在英國首五仗都未勝，兩歲表列賽跑盡亦只得第四，要到第六仗才勝出四匹馬場合的1200米處女馬賽，加上第二名Piccadilly Jim實力平平，很難高估其實力，估計只是「心甜意合」或「吉祥」之流。
反而今場另一英國馬「天才」肯定身懷高質，來港後僅一戰，乃上季四月田草1200米跑第四，幾乎與前三名「福毅」、「一馬當先」及「驍武」同到，之後「福毅」三捷已升至91分，可見69分的「天才」潛力極佳。
睇番「天才」在英國初出1200米直路賽一役已露鋒芒，出閘失機損失成三馬位，跑到半程包尾落後甚遠，惟逐步加速之下居然愈追愈近得殿軍，再出輕鬆以九馬位補中，姿態極具說服力。
雖然「天才」已缺陣10個月，但今季完全冇停過課，特登操咗成半年先出賽，無非希望久休復出即勝，加埋個三檔好位，真係唔好睇低。