都話廖創興家族成員廖湯慧靄嘅細佬湯文亮呢排好紅㗎喇，佢早前估細價樓三個月爆煲已經贏盡人氣，最近佢仲出埋新書叫《逢三退一》，教讀者點樣睇樓市，原來佢諗住密集式出夠七本書先夠皮呀。
縱橫地產界三十年嘅湯文亮，一向滿肚墨水，好鍾意筆耕，除咗有網上博客外，又喺報紙同周刊寫專欄，成日同讀者分享樓市投資心得。佢新出呢本《逢三退一》今個月先至面世，上架冇耐。
其實呢本已經係佢近三個月以嚟第二本書，舊年年尾佢先至出咗本《第10個人理論》，都係將以前寫落嘅專欄作品集結成書。
不過，湯文亮話未夠喉，計劃出夠七個系列，暫時諗緊第三本大綱，希望暑假書展前出多兩本。雖然內容仲未度掂，但封面就諗好晒，會用彩虹七色。暫時出咗兩本書分別係用黃色同藍色做封面，如果儲齊一套，認真色彩繽紛嘞。