經歷重重波折，王維基的香港電視網絡（HKTV）終於在去年十一月十九日開台。回顧馬年，王維基表示雖然大起大落，但感覺既開心又好玩。今日年三十晚，王維基特於尖沙嘴米芝蓮一星食府擺下維基飯局，跟廖啟智、張可頤、石修、王宗堯、潘燦良、黃美棋、黃芷晴、周家怡、曾偉權、梁健平和陳詩慧團年，並請來中菜行政總廚梁輝雄師傅炮製「十二道基味」意頭菜慰勞眾人。飯局中，可頤和智叔等不停鼓勵和游說王維基繼續開劇，甚至爭住舉手參與新劇，令維基無言感激。
想做好質素
王維基笑說：「明年希望做多啲網購生意，就算我哋唔能夠攞到免費電視牌照，都拍多啲唔同類型劇畀香港觀眾。」是否收視回落而暫停開劇？王維基否認說：「我冇話唔搞，我係睇多兩三個月，睇清楚觀眾口味同要求。我想做一啲有quality嘅嘢，上市公司最低限度係收支平衡，過去十一月十九號到𠵱家，我證明到畀香港人睇，香港電視劇仲有好大發展空間，題材同認真度我哋都可以做得好啲，仲改善緊。」雖然做電視蝕錢，但王維基不曾後悔說：「呢條係一條好精采嘅路，我哋唔係拍電影鋪鋪清，做電視唔係短線投資，蝕三、四年我係預咗，唔可能做一年就賺錢，如果做到免費電視牌、移動電視牌，我相信一、兩年可以賺錢。」
羊年好兆頭
展望羊年，王維基表示樂觀：「收視OK啦，同埋我哋早排推出喺電視可以睇VOD，多番好多人喺大電視點播，同埋網購我哋做極都做唔切，相信二○一五年對我嚟講都係一個好嘅年頭。」至於港視截至本月十日的收視報告，雖然點播用戶僅得五萬八千，但直播用戶卻跳升至十二萬一千，比之前升了二萬二千，可喜可賀。
採訪：戴彩煥、溫敏芝、盧妹
鳴謝：海景嘉福酒店海景軒
「十二道基味」菜單
1.叉子臘腸卷
2.瑪瑙水晶片
3.京式燻素鵝
4.百花火鴨方
5.二松龍蝦球
6.玉環如意
7.生煎釀金蠔
8.一帆風順
9.泮塘山楂卷
10.大展鴻圖年糕
11.香芒糯米卷
12.奶皇脆春卷
群星等埋位再拍劇
《選戰》將於本周六播出大結局，有份演出的廖啟智、王宗堯、石修、曾偉權等都極為期待，着王維基早日開拍《選戰II》，智叔說：「我哋好實在嘅，有好戲咪拍囉。」與潘燦良在《來生不做香港人》飾演情侶的張可頤大讚維基是有心人說：「佢係香港少數嘅異類，要好好珍惜。」分別演《導火新聞線》、《四年B班》及《歲月樓情》的周家怡、石修及曾偉權，寄望港視重組戲劇組，揚言隨時埋位拍戲。而傳不和及有份演《我阿媽係黑玫瑰》的黃美棋與黃芷晴，則笑言新一年要踢走是非。
