假期間睇足球直播，大多數人都好似左丁山咁，鍾意睇英超足球，歐洲四大聯賽之中，意甲已經沒落，球星出走，球會冇銀，幾反映意大利嘅整體經濟唔妥。西班牙經濟亦唔見得好，但西甲勝在有兩支皇牌隊伍，皇馬與巴塞，三年來加多一支馬體會，三強鼎立，呢三家對壘，仍有可觀之處，特別係皇馬與巴塞憑歷史原因，吸引天下天才球星加盟，唔到你唔服。至於德甲，成也拜仁慕尼黑，敗也拜仁慕尼黑，一間球會獨大，過去多蒙特可以威脅佢，佢就立即用銀彈政策撬走多蒙特嘅主力球星，今季多蒙特實力大損，要打護級戰，實在可悲，如果在其他行業，拜仁可能俾政府控告違反競爭法，意圖壟斷市場，令足球聯賽缺乏競爭性。
相反英超雖無C朗、美斯、比路、尼馬、蘇亞雷斯呢類超級球星，勝在20支球隊之中，有實力爭入前四名嘅，竟有七隊（車路士、曼城、曼聯、修咸頓、阿仙奴、熱刺、利物浦），爭持十分激烈，故此曾在英超、意甲、西甲、葡甲攞過聯賽冠軍嘅車路士領隊摩連奴話：「喺其他歐洲聯賽，領先七分我就會偷笑，但在英超，我嘅車路士雖然領前七分，我唔敢笑。」
咁囉喎，全世界睇英超多過晒睇其他聯賽，最近英超宣佈2016-2019年度共三季球賽嘅現場電視直播權利費，高達51億3千6百萬英鎊，相等於六百幾億港紙，多到嚇人。英超開始之時，頭五季（1992-1997）嘅直播費只不過係1億9千1百萬英鎊而已，平均每季唔夠4千萬鎊，未來三季係每季17億1千2百萬鎊，增長率高到無人信。呢大筆費用由Sky（天空衛訊）支付41億7千萬鎊，直播126場，BT（英國電訊）支付9億6千萬鎊，直播42場。咁多錢，由20間英超球會分享，個個肥仔，連降班嘅包尾球會都會分得至少949萬鎊，冠軍球會有1億5千萬鎊獎金再加轉播費。英國體育大臣即時呼籲英超回饋足球，多撥款支持基層大眾足球會培育新一代球員。但英超CEO Richard Scudamore唔怕俾人鬧，回應時話：「英超唔係一個慈善團體」，坦白得可愛可恨。有錢就有錢嘞，但英格蘭本土球星與南美、西班牙球星相比，技術始終係差啲，既然咁有錢咯，都係時候進行青訓改革，提升英國足球水平咯。