譚詠麟前晚第四場紅館騷請張學友做嘉賓，兩人合唱《誰可改變》全場震撼，阿倫謂這晚因學友做嘉賓，黃牛飛被炒貴幾倍，學友則自爆媽咪和妹妹叫他撲六張門票，怎知他託盡關係都一票難求，學友說：「後來要同阿倫講嚟做嘉賓，先呃到四張飛，幾慘呀！」
阿倫讚學友用七年時間籌備新國語碟，非常精益求精，又問學友為何要去英國錄國語碟？他表示想大碟有一點英國味，阿倫抵死問：「乜𠵱家啲英國人開始講國語咩？」學友笑說：「咁音樂又冇分語言，我又真係未見過結他講國語喎！」
此外，阿倫日前率眾環球歌手拍賀年相，阿倫提議大家寫揮春考創意，不過關楚耀連「耀」字都寫錯，笑言：「好耐冇試過罰抄自己個名，所以一時間諗唔起。」
撰文：皓騫