中信大錳（1091）昨收報0.72元，比起上市價，仲係大跌咗七成過外，何止一步之遙？又集團啱啱派咗上年度嘅成績單，大止血兼錄到有盈利，博中信大錳海底翻身，有得諗。
中信大錳係大孖沙中信系統裏面，兼且係全國鋼材原料錳嘅最大生產商。集團啱啱公佈冇耐嘅上年成績單，由二○一三年大出血2.4億元，轉為盈利一千五百五十萬元。喺上年下家鋼材嗌晒救命時，中信大錳憑住經營優勢，能夠由虧轉盈，已經交足功課。
受惠國策可大翻身
中信大錳家陣一百三十五倍PE，老老實實咁講，係唔多吸引，但要咁睇，再對上兩年，祖國鐵路、核電同房產，政策未出籠之前，瓣瓣都唔掂。但隨住新領導上場，前邊兩瓣已經火速前進，而喺報載，單係上年十月到今年頭，阿爺已經密集式批覆六十二個包括鐵路、公路機場同城軌項目。再對外，兼搞埋一帶一路，同亞洲周邊各國互為刺激經濟政策。
又上年，祖國超額完成淘汰落後煉鋼產能三千一百一十萬噸（工信部目標二千八百七十萬噸）。諗到嘅係，呢一邊，祖國多個基建項目等上馬，加埋借住一帶一路走出去，提振需求。另一邊廂，阿爺就通過行政手段，着手cut落後產能，在雙管齊下，對好似鋼材同水泥，肯定起到支持嘅作用。
再講，中信大錳產品，有出口印度嘅經驗，順住一帶一路，又開多條財路。有質嘅改變，中信大錳喺由虧轉盈基礎上，今年再下一城，有博大翻身機會。中信大錳二○一○年上市，上市價2.7元，現價（0.72元）累跌七成過外，得0.59倍PB，環球行家BHP Billiton 1.7倍、OMH 0.9倍，當中信大錳追番到OMH嘅水位，都講緊要升翻半番到一蚊樓上。
錢雋
細價股專家
本欄逢周二、三、五刊出