抽到對低組別球隊就易出線？曼聯就似乎係遇弱越弱，次次都贏得驚險。禮拜一英足盃十六強賽，紅魔喺先落後下，靠三個具爭議性嘅入球，作客反勝英甲嘅普雷斯頓3:1，八強會喺主場硬撼阿仙奴。我求大俠睇番片段，曼聯啲入波有越位、有推人、有插水，球證執得緊的話，三個入波都可以唔算數！
曼聯呢場強陣出擊，係尹佩斯同卡域克傷咗唔出得，隊長朗尼打番前鋒，拍住法卡奧，費蘭尼、迪馬利亞同安達靴里拉都有上陣。可惜上半場紅魔繼續踢悶波，威脅射門都唔覺眼。換邊後，仲俾普雷斯頓突擊搞掂，落後0:1。曼聯之後變陣，用艾舒利楊格入替踢咗成個鐘都係零射門嘅法卡奧，打番兩翼齊飛，球隊嘅進攻先順番啲，但反勝啲入波全部有問題。
朗尼「插水」遭炮轟
先講安達靴里拉追平嗰球，佢射嗰陣朗尼就企喺龍門口，明顯越位。雖然朗尼攤開手、縮起個肚腩，但個波的確喺佢腳邊經過，多少都影響咗普雷斯頓門將史杜文嘅視線。不過球證當佢冇參與呢個攻勢，唔當越位，曼聯成功追平。之後路爾斯華倫西亞傳中，費蘭尼先推開對手再頭槌攻門，雖然被撲出，但佢補射入網，幫曼聯領先。
完場前朗尼突入禁區，遠睇好似被史杜文撲跌，球證判曼聯獲得十二碼；但睇慢鏡，史杜文完全冇掂到朗尼，係朗尼「插水」。朗尼主射破網，結束個人九百五十二分鐘嘅入球荒，助曼聯鎖定贏3:1。
賽後普雷斯頓領隊格雷臣都好無奈，「朗尼同門將係冇接觸，佢跳高咗。我唔會評論呢球係咪十二碼，但總之佢兩個係冇接觸。至於第一球都係有爭議，朗尼企得好近門將，有干擾到，存在灰色地帶。」曾效利物浦嘅前英格蘭國腳前鋒哥利摩亞亦都炮轟朗尼，「作為曼聯同英格蘭隊長，朗尼唔應該插水，佢係呃緊人，我對佢幾失望。」
利物浦成奪冠大熱
唔理普雷斯頓幾唔抵、啲反曼球迷幾咁激動都好，曼聯已打入八強，下圈抽中對阿仙奴。八強對布力般流浪嘅利物浦以2.65倍成為頂頭大熱。
識睇，一定係睇足英台【英波Live】：
http://soccer.appledaily.com
http://bit.ly/engballlive