趙薇、范冰冰做大股東的唐德影視，噚日A股上市首日大升44%，按兩人持股量一百二十九萬股與一百一十七萬股計算，兩人單喺第一日已經賺接近一千三百萬元人民幣同一千兩百萬元人民幣，真係好搵過拍戲多多聲。唐德影視攝製的《武媚娘》，因劇中女角過度暴露，而慘被廣電總局剪去所有胸部鏡頭，點知在內地更製造話題，收視率反而節節攀高。唐德影視一炮打響，股價一飛沖天。
內地影視股近期好掂，其中一個原因是今年有七部賀歲片上畫，創咗歷史新高。市場估今年賀歲票房可能打破紀錄。A股禮拜二有七隻影視股升停板，情況誇張。睇番A股近期新上市兩隻影視股表現，中文線上一月二十一日上市後，連續十七日升停；萬達院線一月二十二日上市後，也連續十一日升停；睇怕趙薇、范冰冰之後仲會繼續豬籠入水。
內地影視股炒爆，香港呢邊就冇動靜。趙薇同丈夫黃有龍喺去年十二月斥資約三十億元，買入阿里影業（1060）成為公司第二大股東，每股平均價1.6元。阿里影業噚日收報1.6元，趙薇暫時冇錢賺，同唐德影視差天共地。內地股民炒影視股有錢贏，可一直熱炒；香港股民炒阿里影業恐怕輸錢為多，股價一直炒唔起。
李可強