特首女梁齊昕放風有興趣入娛樂圈，火速被電影公司贒中開戲邀任女主角。前晚齊昕現身新片男主角李逸朗（Don）的音樂會，全程被Don經理人貼身碼實，據知，名公關鄭紹康也有意跟齊昕簽經理人合約，還有信用卡廣告想邀齊昕拍攝，特首女果然未出道先轟動。
特首梁振英女兒梁齊昕近日成為娛圈風頭躉，自從她流出自薦做model的電郵後，引起娛圈各方人馬爭奪。繼上周有電影公司開記者會，宣佈邀得齊昕做女主角，拍攝一部由曾執導三級片的導演劉俊輝開拍的新戲外，nowTV高層何麗全也表明正斟介齊昕合作。
今與家人外遊
本報收到消息，身為徐濠縈、黃偉文、薛芷倫經理人的名公關鄭紹康，有興趣簽齊昕做旗下藝人，為她安排加入娛樂圈後的青雲路。消息指雖然家人反對入行，但齊昕堅持己見，今日她會跟家人去旅行避年。
昨記者致電鄭紹康求證，他說：「唔係經理人，只不過朋友形式幫佢，好多嘢仲傾緊。」問到齊昕近日是否情緒波動大？他說：「今日未通電話，噚日情緒就OK，佢係好smart嘅人，有自己期望，我盡量幫佢，其實每日都好多人搵佢出活動，又有信用卡廣告搵佢拍，仲有啲劇搵佢，年輕人樣樣都可以試吓，睇吓歌影視邊條線啱發展。」齊昕上周現身中環時被發現八達通沒錢，去提款機撳錢又失敗，如拍信用卡廣告甚具噱頭。問如做齊昕經理人，會否擔心特首辦約傾偈？他笑說：「咁敏感問題唔答。」
日前齊昕缺席新戲記者會，有傳她受阻不會接拍，導演劉俊輝昨在電話說：「呢部戲三月開，到時睇吓咪知佢會唔會拍。」傳聞有人想買回齊昕合約？他否認：「冇咁嘅事，佢有興趣演戲，角色啱搵佢做就咁簡單。」
Don經理人碼實
此外，前晚齊昕現身Don音樂會至消夜，全程由英皇藝人管理部前總經理Kitty媽（鄭燕玲）貼身碼實，Kitty媽離開英皇後跟友人合組天立娛樂唱片公司，旗下藝人有Don、梁雨恩和應昌佑。昨日問Kitty媽是否有興趣簽齊昕？她說：「冇諗過呀，噚晚只係普通傾吓偈，唔會覺得佢係特首女有乜特別，普通市民咁。」
採訪：鍾國仁、皓騫