雖然獅子行最近被各種負面消息纏繞，但不減佢哋慶祝一百五十周年嘅興致。大家近日行過中環滙豐總行地下，有冇發現越來越多嘢睇？除咗早排揭幕嘅兩隻花崗岩獅頭石像（原本係一九三五年放喺第三代滙豐大廈樓頂，拆卸後保存至今），同埋廣場地板上嘅懷舊石刻街道圖；對住皇后大道中方向、靠渣打銀行嗰邊，𠵱家又有鐵欄圍住一個大位置，似係有嘢要擺。
聞說，一位英國藝術家製作咗兩個頗為巨型嘅雕塑送畀獅子行，香港與英國各有一個，雕塑外形似一雙手合埋，呢個雕塑近日運到嚟香港，但係管理層諗緊幾時為佢揭幕，可能會作為百五周年慶祝儀式嘅一部份。
不過，對於滙豐股東，當然希望管理層實實際際，過年後派份似樣嘅成績表，順手宣佈增加派息或者派特別息咁就最高興嘞。