美國的士電召app Uber之前突然率先挑起戰線，請人免費搭的士。點知咪捉蟲囉，本身旗下的士又少過人，唔少人都喺網上勁呻。
本身未站穩住腳就惹來負評，對公司形象絕對唔係好事，最慘係影響用戶體驗，中晒startup大忌！加埋惹來快的taxi反擊，恐怕得不償失。
菲菲有幸搭到一次免費Uber，司機就話Uber衰在冇限用家輸入目的地，司機大佬冇得揀客，自然唔鍾意用。
講番股票，噚日鱷魚恤（122）因為賣盤消息，勁升83%，表現咁好大家自然就會想搵翻版，要數翻版就要睇王氏港建（532）。首先，兩間公司同樣曾經提出私有化，但最後都失敗。
王氏港建二○○六、○七年試過兩次私有化，但都係告吹。之後主席王忠桐二○一二年接受傳媒訪問時，就話唔再搞私有化，反而如果價啱就會考慮賣，仲要對家唔大唔賣。而家一殼難求，當鱷魚裇同樣約五億市值都賣得去，大大增加王氏賣殼機會。
近幾隻殼股，好似景福（280）、俊和（711）落鑊後，最高都炒到超過0.9倍PB。以0.9倍計，要去到1.7元，就算打八折都1.36元，而家股價一蚊都冇，你話係咪值博先。
Fifi
http://www.facebook.com/lovefrystock
本欄逢周二、四刊出