港股成交係今年最少，大戶今個星期索性收爐，不過，晉佳保持睇好後市，估計農曆新年假期過後，港股將會向好，無幾耐之後將會明顯突破25000點，若按捺咗咁多年嘅25000點都能夠突破嘅話，後市就唔估頂咯。點解睇好先，就係因近排環球宏觀經濟環境穩定，同時又見唔到股市出現超買情況，投資氣氛仍偏向審慎，呢啲應該係買貨嘅良機。話近排宏觀環境穩定，原因係所謂負面因素暫時不足慮。
市場最近驚緊通縮，惡性通縮可怕嘅地方，係因為所有人預期物價會下跌，所以再唔係通脹環境下，貨品遲咗買會變得越貴，而係越遲買嘢貨品賣得越平，變咗遲買更享受，令所有人推遲消費，形成惡性循環，令經濟跌入收縮周期。
由於港股超過一半係中資股，故要仔細留意內地CPI。如果講內地一月CPI數據就可發現非食品價格上漲0.6%，當中，價格下跌嘅部份係交通、煙酒、通信同用品價格，換言之，跌價嘅主要都係必需品，搭車、交電話費，都係日常生活之中無法拖延消費嘅部份，晉佳估計，跌價部份可能只有汽車同手機係可以推遲消費，其中國產手機不嬲惡性競爭，鍾意玩減價戰，是常識吧。至於衣着、醫療保健和個人用品、家庭設備用品及維修服務、居住、娛樂教育文化用品及服務價格分別上漲2.9%、1.6%、0.9%、0.8%和0.3%。
由此可見，單計內地CPI，暫時睇唔出物價部份會形成推遲消費嘅情況，中央對呢種通脹放緩情況當然唔會掉以輕心，放水等等嘅刺激措施可以維持通脹預期，唔令物價升幅放緩嘅問題惡化。
中線低吸中化肥
相反，必需品價格下降反而令到人民有更多閒錢去買其他消費品，呢種通脹放緩情況，暫時睇唔係壞事，之所以先有良性通縮呢種講法。真正嘅負面因素欠奉，所以港股近期都生猛番少少，恒指能夠重返保歷加通道中軸樓上，似乎係跌唔落嘅好兆頭，如果跌唔落，之後梗係挑戰高位。
藍籌股穩步上揚，但似乎二、三線股更活躍，優質嘅二、三線股更不能錯過，其中，創維（751）公佈靚仔數據，中化肥（297）經營狀況亦似見底，睇圖亦分別向上突破橫行區域以及圓底頸線，中長線看高一線，只要短期內有調整，都會係中線低吸之選。
晉佳
http://www.facebook.com/pages/晉佳/719009541518415
本欄逢周二刊出