早前曝光嘅幾名亞視白武士當中，包括舊東家邱德根家族成員，即係邱德根二仔、遠東發展（035）主席邱達昌。噚日邱德根第七子邱達文忽然宣佈辭任同系遠東控股（036）非執董職位，原因係「為投入其他商業機遇」。呢個理由有少少耐人尋味，令人產生好多聯想，邱達文嘅其他商業機遇會唔會同亞視有關㗎呢？
市場對邱達文頗為陌生，佢係劍橋經濟系畢業生，都已經四十七歲，九十年代加入遠東集團工作，作風一向低調，普羅大眾對佢較有印象，應該係二○一○年，佢向終審法院上訴，不服法庭判佢支付前妻三千七百五十萬元贍養費；邱達文最終得直，贍養費金額大幅減至一千一百九十萬元。