現代足球，中鋒一職極珍貴，要求極高，踢得呢個位，注定成眾矢之的；不過「銀河唯一」，應該再冇阿仙奴中鋒基奧特。
經常俾本地男球迷笑成個銀河系，最唔識入波嘅法國國家隊中鋒基奧特（圖）；去年鬧過桃色新聞，季初又斷腳唞三個月，搞到波士雲格要破財買韋碧克返嚟頂檔。年尾法國型佬又衰衝動，頭撞對手被罰停三場，黑爆。不過踏入今年短短個零月，見佢個人落場態度明顯收斂，少說話多踢好波，近七戰錄四入球三助攻；阿仙奴下半季爭「兩盃一歐聯位」，佢係食糊重心。
有廠內大勇嘅辛迪卡索拉同傷癒後唔同款嘅奧斯爾不絕供應、又將兩位打過箭頭嘅韋碧克同阿歷斯山齊士移邊，「銀河特」喺獨擅嘅中鋒位置，發揮威力。如果以今季四大主要賽事（即英超、英足盃、英聯盃、歐聯連附加賽或歐霸盃）的數據比較，佢出場一千○四十七分鐘，入咗九球，平均116.3分鐘就已入一球；呢項數據，對比英超𠵱家前三位射手連同歐洲賽紀錄，僅唔夠第二位嘅阿古路（平均90.1分鐘入一球）同第三位嘅哈利卡尼（平均103.9鐘入一球）勁，但勝過要平均127.2分鐘入一球嘅迪亞高哥斯達。基奧特𠵱家嘅射術、身形，遠勝佢兩年半前，由蒙彼利埃加盟時嘅一千萬鎊多少少嘅貨色；同位置嘅韋碧克雖然今屆歐聯擔正四場入三球，但入球能力一向唔算超卓，惟有等進步等機會再「佔中」。
英超金蛋化，錢字當頭，但近年阻唔到土炮上位機會，單係要喺三獅兵團入面「佔中」已經爭崩頭。睇番英格蘭國家隊上年年尾，分別贏斯洛文尼亞同蘇格蘭3:1，兩位正箭頭韋碧克同朗尼，包辦當中五個入球；不過「韋少」放邊，三十萬鎊周薪嘅朗尼，喺戰術大師雲高爾指導下，默默為紅魔犧牲改踢中場；朗尼喺二○一五年踢過八場，入球、助攻零蛋，亦唔見幫到雙箭頭尹佩斯同法卡奧，嘥料。老鶴臣下月尾為英軍點兵踢國際賽，前線會有史杜列治復出，又有極速上位嘅哈利卡尼同比拉希奴，火力強橫，朗尼同韋碧克要繼續霸住國家隊傳統雙箭頭位置，唔易。
車仔以守為攻，要喺隊內「佔中」更難；今季暫時喺聯賽放頭，主因都係肯花錢買到頂級西甲射手、迪亞高哥斯達番嚟打單箭頭；呢位「野獸先生」近排喺聯賽停三場，加埋車仔上周末冇波，成隊儲夠火力，今晚喺歐聯淘汰賽先作客陣容殘缺嘅巴黎聖日耳門，「讓球」平手盤，捧車仔坐和望贏格。文：波神