雖然有云虎父無犬子，不過以往嘅球王好似比利、告魯夫，下一代踢波嘅成就都唔高；新一批「星二代」大家都吼住碧咸大仔布魯克林，雖然佢只得十五歲，已經「升呢」踢阿仙奴U18，唔知幾年後布魯克林有冇機會用家傳嘅七旋斬傳中，畀周日梅開二度助阿仙奴殺入英足盃八強嘅前鋒基奧特呢？
只列後備 萬人迷白走
布魯克林雖然只係十五歲仔，但深得老竇碧咸栽培同鼓勵，之前都跟過洛杉磯銀河等青年軍，上年十一月正式加盟阿仙奴，進軍職業球員之路。上周六阿仙奴U18主場對李斯特城嘅比賽，布仔仲「升呢」列入大軍名單，碧咸都好緊張，去到球場一心睇囝囝表演，可惜布仔只列後備，而且未被換入，阿仙奴以1:0小勝，萬人迷今次白走一趟。
其實布魯克林都好鍾意喺個人Instagram分享波牛生涯，好似上星期就上載過自己比賽片，一次右路推進笠射中楣彈出，睇出腳動作都同老竇有幾分似；而且布仔同隊友都幾好朋友，佢亦喺Instagram分享過同隊友大合照，睇嚟隊友冇因為布仔係星二代而針對佢。講真阿仙奴領隊雲格咁鍾意用幼齒，布魯克林浸多幾年踢英超都唔出奇。
阿奴輕取米堡入八強
講開兵工廠，又點可以唔提佢哋衞冕英足盃之路，周日主場對英冠嘅米杜士堡，靠「銀河唯一」基奧特梅開二度，2:0淘汰對手晉級八強，雲格當然大讚基奧特，話呢位法國前鋒比起初加盟時，已經提升到唔同層次㖭。隨住車路士、曼城等強隊上圈出局，周日再有一支英超兵新特蘭，作客0:2喪師英甲嘅巴拉福特，英足盃又少一隊英超兵，唔通整定阿仙奴可以冧莊？
另外，據西班牙一間電台賽後報道，話阿仙奴三十歲中場辛迪卡索拉，已經同西甲勁旅馬德里體育會達成個人協議，準備今夏就走人，雖然雲格對已過三十嘅球員唔太留戀，但卡索拉今季打到曉飛，又助攻又入波，如果真係放走佢，雲格肯定又俾廠迷圍插。
識睇，一定係睇足英台【英波Live】：
http://soccer.appledaily.com
http://bit.ly/engballlive