近期內地唔少IT公司鬥曬年終花紅，但可能都唔及其中一位老闆陳大年（佢係內地前首富，盛大網絡老闆陳天橋之細佬）搶眼，佢上周宣佈，所有員工，不論職務高低，每人派一部價值近百萬的特斯拉（Tesla）電動跑車作為年終獎！消息令業界譁然，該公司有過百位員工，據聞將是Tesla在華最大定單。
內地搞電動車多年，一直搞唔起，缺乏充電網係主要原因。Tesla喺內地賣唔出一啲都唔出奇。Tesla喺內地銷量低迷，中國區銷售主管頻頻更換，連帶曾熱炒的Tesla概念股之前亦被拖累。上周末呢單土豪派Tesla新聞曝光，即刻令物產中大、正海磁材呢兩隻概念股噚日升停。
美國蘋果公司正研究電動車，話要挑戰Tesla；內地樂視網有樣學樣，話要搞智能汽車系統，之後股價不斷攀升，昨日又再升停板。內地連充電網都未搞掂，而家就搞互聯網汽車會唔會太快？比亞迪董事長王傳福曾嘲笑樂視網話：「互聯網造車是在開玩笑，只是一個概念和炒作而已。」
其實咩話互聯網車，連成個電動車概念都只係得個炒字。陳大年只係落單買約一百部Tesla，就令成個板塊被炒起，連比亞迪（1211）A股昨日亦升停板，可見炒風有幾熱。
李可強