風水唔係中國人專利，在港居住三十幾年、來自新西蘭嘅第一代星級地產分析員卓百德（Peter Churchouse），繼續喺賀年卡用五行預測羊年投資宜忌。
卓百德冇透露自己點識用五行預測投資前景，但佢估舊年恒指上半年大跌，年尾反彈；舊年恒指的確係上半年chok吓chok吓，年尾標青，都算係準。
嚟緊羊年，佢估大市先升後跌，建議投資者唔好太進取，萬事小心。五行板塊會平均發展，屬火嘅電子、能源股稍為突出，其次係屬木嘅紡織、印刷等，最差係屬金嘅鋼鐵、珠寶股。
至於卓百德最在行嘅地產股，佢只講內房，話今年會見底慢慢復蘇，事關投機者已經離場，叫用家等多陣先上車。
最近好多人患流感，卓百德都話，羊年會係病痛年，病毒會由華南，即係廣東、香港一帶，傳去東南亞咁遠，都咪話唔驚。