年關難過年年過。梁班子馬年施政唔算暢順，羊年肯定想有個好開始，但埋尾嚟個創新及科技局硬闖關，最終都係唔可以如願喺死線、即係情人節當日通過「埋齋」，但羊年卻已經可以預見，形勢相當不妙。典解呢？除咗近期爆發嘅流感、亞視續牌問題，隨時成為特區政府攞你命三千。
由於今年底有區議會選舉，唔少建制派中人求神拜佛，希望特區政府生生性性、唔好亂嚟失分，佢哋食住追殺泛民佔領運動「搞亂香港」、辭職公投「浪費公帑」，區選呢場仗就易打咯。所以呢，有建制中人都話要𥄫實，特區政府喺呢場流感大戰有冇怠懶？因為但凡牽涉人命，市民都好肉緊，呢位建制中人舉例，二○○三年沙士後嘅社會狀況，唔通對特區政府冇啟發？
另一個令建制派中擔心嘅，就係亞視嘅續牌問題。又講真吖，從政府咁樣縱容亞視唔交牌費又畀人工，證明根本就會畀亞視繼續「有良心」落去，但民意卻好明顯覺得，亞視無藥可救，執笠好過。若然喺呢股民意下續牌畀亞視，建制派選情難免凶多吉少，事關睇電視嘅權利，對唔少市民尤其師奶嚟講，重要過一人一票選特首囉，點知會唔會嬲到反枱起革命？
據知有建制派已經提醒政府處理亞視問題要「醒少少」，以免「黑狗偷食、白狗當災」。縱使梁班子同建制派，明明都係一擔擔。
花生友