四歲馬系列次關1800米香港經典盃跑編於第九場，係農曆新年前最後一項盃賽。結果頭二馬一如第七場1200米主席短途獎般，影相以短距離分勝負。
今場田泰安策騎蔡廐「酷男」直路一度已被雷神座騎賢廐「精彩鬥士」超越，不過人馬一樣咁韌，臨門回氣反敗為勝，看似平頭，但其實以馬鼻位之微險勝「精彩鬥士」，爆23倍冷win捧盃，田泰安鬥贏雷神打出身價波，個人在港首勝一級賽。至於「男」系馬繼季初憑「將男」摘下國際二級賽馬會盃後，亦增添一項分級賽冠軍。
「酷男」大前仗初出由雷神輸完，之後就落入田泰安之手，前者冇再騎過，呢次正正就係殺低雷神，粉碎蘇偉賢首勝一級賽之大計。
有人快樂有人愁，「精彩鬥士」屈居亞軍，連捷失敗，三、四名分別係「大印銀紙」及「美麗大師」，全場最熱三駒包辦二至四名，畀一隻「酷男」劏晒。東廐全日三場盃賽輸到位置都冇，一對擂台躉主席短途獎「幸福指數」同香港經典盃「美麗大師」都係梗頸四，捧場客做咗東廐苦主。