中電（002）企業發展總裁莊偉茵（Quince）有一位非一般老公。佢同老公黃楚權（Adam）結婚接近廿五年，過去十七年一直係男主內、女主外，難得兩人懶理世俗眼光，生活如魚得水。上星期六情人節，Quince需要返工，帶領一班小股東參觀電廠，Adam實行隨行晒恩愛。
Quince就話，「我做咁多份工，佢都會陪我出席公司活動，無論係旅遊協會、酒店或者係航空公司。反而到我（二○一二年）加入中電，佢覺得我大個，可以自己搞掂，已經唔係好跟我嚟」。
不過上周六係情人節，情況當然唔同喇。Quince指，兩名分別二十三同十九歲嘅寶貝仔都去咗澳洲讀書，如果佢返工，老公得一支公喺屋企。所以即使山長水遠，佢都請埋老公一齊去。
為應節，Quince兩公婆亦向在場小股東大派朱古力。有小股東見佢哋恩愛，都報以羨慕眼光，異口同聲話佢哋好襯。Quince笑住回應話：「我同佢係同學，但係我哋唔可以一齊打工，我哋會鬧交。」