成軍冇耐、下季將首次出戰美職聯嘅紐約城FC，上周抵達曼徹斯特集訓同宣傳，靠「大佬」曼城關照下，風頭完全唔弱過啲英超球隊。
曼城最近又安排活動畀紐約城博吓見報，就係搵射手阿古路同轉投咗該隊嘅西班牙前鋒韋拿，喺訓練場嚟一次射術大比拼，睇嚟阿布扎比老闆叫到，曼城百忙中都真係畀足面幫手宣傳。
曼城同紐約城FC，都屬於阿布扎比富豪蒙蘇旗下嘅城市足球集團，所以今次紐約城點解揀曼徹斯特為集訓第一站，大家都應該好清楚，而今次搵阿古路同韋拿喺訓練場鬥射術，可以話夠晒噱頭。兩位都係世界級射手，仲要都效力過馬德里體育會，我求大俠就咁聽，都覺得幾過癮。
帶隊夜蒲 林伯唔見影
而且今次射術比拼係要戴上眼罩、蒙住眼之下進行，仲會分為三個項目，包括互射十二碼、射門楣同埋開角球彎入，咁就真係好大難度，好考兩位嘅觸覺，尤其射門楣同開角球彎入呢兩項，平時比賽中擘大眼都未必做到啦！
除咗官方搞活動，曼城球員私底下亦盡顯地主之誼，趁英足盃出局、周末冇比賽，帶紐約城班球員，去見識吓曼徹斯特嘅夜生活。傳媒影到門將赫特全套黑衫黑褲，拖埋金髮女友甘芭莉一齊出席，仲有占士米拿同長坐冷板嘅三號門將李察胡禮，連已經轉投去愛華頓嘅舊隊友巴利都有出現，但就唔見林柏特嘅蹤影。我求大俠心諗，𠵱家赫特佢哋招呼緊嘅係你啲隊友喎，你反而唔蒲頭，唔通因為之前由借用變長留「藍月亮」事件，搞到大家心中仲有條刺？
識睇，一定係睇足英台【英波Live】：
http://soccer.appledaily.com
http://bit.ly/engballlive