譚耀宗，你細細聲講都唔得！除非你細細聲講十個f××k兼廿個仆街，超越狼齊陰，陳振彬會裝聾，唔會喝令你收聲，周融還會叫你「幫港細聲」。
譚耀宗，你細細聲講都唔得！除非，你是報數，篤爆到底邊個泛民機不可失，終極轉軚袋住先。雖然你細細聲，但根據唇讀，傳媒很快會讀出那關鍵四票，你成為一步之遙的英雄，林鄭和齊陰會左右對嘴，惜你N啖。
譚耀宗，你細細聲講都唔得！除非，你是開到口，叫闊佬捐款給民建聯。年年豬籠入水，今年你細細聲開口，闊佬睇西環頭，一定勇捐。你愈大聲，捐愈大筆。聽講已經有闊佬暗示，會搵人落藥，等你全年都只能細細聲，咁就可以捐少些，冇咁肉赤。
譚耀宗，你細細聲講都唔得！除非，你是說，裸退後想入HKU做副校長！咁驚驚，細細聲好啦，否則，香港怪獸家長排長龍幫仔女退學，逼爆薄扶林，癱瘓中西區，堵塞三條過海隧道啊譚校長！