上個禮拜，中紀委拋出一份重磅新一輪央企巡視名單，一般人會覺得凸顯中央反貪腐決心。但筆者卻想，點解要咁急咁快呢？上一輪巡視，只係查六間央企，今次一查就係二十六間，且好多係中移動（941）、中石油（857）之類的巨無霸，有幾萬億元資產，幾十萬員工；中紀委人手有限，要查晒需動員龐大人力物力。
而且份名單亦有古怪。上次查中石化（386）、南航（1055）、神華（1088）、東風（489）、聯通（762），行業相當分散；而今次集中能源、電力、電信等壟斷行業，向來被視為各大政治勢力瓜分的利益範圍。
筆者唔會咁陰謀論去推測，習近平係想乘機清算前朝勢力；亦唔會天真地以為，李鵬家族的電力王國，或者江澤民的電信勢力就會被連根拔起。不過，中央咁快要查咁多央企，仲話要一年內查晒其他所有央企，的確有一種急不及待感覺。其中一個合理解釋是為市場等咗好耐的國企股權改革鋪路。十八大提出國企混合所有制改革，引入民間股東同時給予管理層股權，再將更多國有資產推上市。但據聞已被習近平叫停，話會造成國有資產流失。而家咁快查數，等於係驗身，避免將來上市益咗對家，之後再上市就順理成章了。
李可強