第七場1200米一級賽主席短途獎係呢日重頭戲之一，高手過招鬥得特別精彩，結果崔護重來客串一天之蘇銘倫，不枉幕後重金禮聘，夥拍高廐「大運財」後上鬥贏擂台躉香港短途錦標盟主「友瑩格」爆8倍win，「友瑩格」短馬頭位影相飲恨屈居亞軍，第三、四名分別係「天久」及「幸福指數」，全場最高分五駒，有四駒入前四名。
「天久」衛冕失敗，連贏兩屆主席短途獎後斷纜，「幸福指數」則係季內首次冇三甲。大摩貴為盃王，今場四路興兵，罕有地前四名不入，其中「恩格斯」第五已係摩廐馬全場最佳名次。
「大運財」乃上季最佳一哩馬，季初由韋達捧走1400米慶典盃，之後全攻1600米，包括香港一哩錦標在內三度得亞軍，呢場首度改攻短途，用新配搭縮程初跑千二米，一檔起步沿途貼欄一步不蝕，拉士見蘇銘倫施展渾身解數，追足二、三百米，終於及時趕過沿欄放鳶之「友瑩格」。
「大運財」在港累計九捷，其中七場都是贏分級賽，總獎金約3,400萬，馬主潘蘇通馬運亨通！蘇銘倫係香港馬壇常客，不過對上一次贏馬，已經係前年12月4日憑「勁飛揚」勝出國際騎師錦標賽次關。