CASIO G-SHOCK錶出名硬淨，啱做激烈運動時戴，但原來都有天敵。話說，前幾日戴緊嘅G-SHOCK，突然時針同跳字顯示嘅時間有差異，時針指住十二點半，但跳字就話已經兩點，最後確認係時針出錯。隻G-SHOCK GA-300A戴咗年幾都無事，個幾鐘前仲準㗎喎。翻查說明書，原來時針會因為強力磁場而錯位，如果發生呢種情況，只要跟說明書校正就搞掂。
跳字受磁力影響
理工大學機械工程學系工程師盧覺強話，時針係金屬配件，遇到強力磁場或會錯位，但部份手錶會有抗磁功能，一般小磁石唔使怕，要較強力嘅磁石先有影響。「誰是兇手」？費清喺放手錶嘅書枱地氈式搜索，其間推跌咗幾粒電芯，電芯啪啪聲咁黐晒喺Lumio書燈度，「疑兇」現形！
Lumio書燈外形好似本書，打開就會發亮，原來書面及底都有一塊隱藏磁石，方便將書燈貼喺有鐵嘅地方，但官網話佢哋用「工業用」磁石，黐咗要用力先扯得甩㗎！呢款燈𠵱家都幾流行吓，連淘寶都有老翻（sorry，馬雲話佢哋唔賣老翻）。如果你都有呢款燈或者有強力磁石嘅家品，記得要遠離手錶喇。
費清 ＃要生計，也要生活 ＃毋忘初衷