「好奇一問，文中並無直接顯示登報者的年齡，為何Son姐會先入為主，認定登報者係『新一代』？」
我怎知是「新一代」？其實不用「估」，登報者自言「大學畢業就進了安永這個家」，如果是老臣子，見證Big 6變Big 5再剩Big 4，不會以「家」來形容公司之外，這些年來甚麼風浪未見過？像何小姐這種這類的主管見得還會少？頂唔順的夠勇的一早走人了，頂得順的要不上了位，要不被馴化或自我催眠，又要養家又要自顧洗腦認命了，私底下日怨夜冤肯定有，不豁出去發報咁英勇？呻吓之嘛咪玩啦！況且會計行業工作刻板苦悶工時長，是早知的事實，食了咁耐鹹魚怎會抵不得渴？背後推波助瀾肯定有，不過出手的必定是「勇」字輩的新一代。
「Son姐講到好多『新一代』嘅缺點都好中我！但我唔會好似佢登廣告咁重皮咯！講到係『離職及現職稅務部員工』，如果要炒，咁炒邊個？如果誓要搵出真兇，即係要同事互相篤背脊，破壞同事關係，以後好難合作。如果只炒登報者，又顯得太草率，求其搵人祭旗。唔做嘢，𠵱家已經唔係公司內部問題咁簡單，關係到公司形象。Son姐高見如何呢？」
這位讀者答得好「只會再升……點會炒？文中嗰啲根本就係高層政績……唔係升佢來做乜？」問問題的小朋友少擔心，我敢寫包單一早經已有「有心人」為表無辜為證忠誠主動報料，何須等互篤？我不信登報事件玩咁大，事前可以完全密封半點風聲都不走漏，若然管理層真的等到見報才知道，真正唔死都冇用！至於炒人炒邊個？當然不會是何小姐，更加毋須急在一時。講來講去我們只是花生友，誰去誰留誰在意？
張慧敏
http://www.facebook.com/HKcareerdoctor