農曆新年團年有湯圓先美滿，協恩中學初中生趁年廿六同約三十個長者，一齊過情人節兼迎新歲，透過義工服務，關心社區人士，但最啱嘅係，參加呢個活動嘅長者，原來都係協恩舊生，四十幾年後返母校，先發現而家啲協恩妹太過怕醜，呢班師姐話希望佢哋主動啲。
協恩中學喺舊年開始，就趁住農曆年假前，招募初中生做義工，喺學校搞場「新春敬老宴」。協恩中學負責義工服務老師陳樂勤同八方講，呢兩年同香港家庭福利會（九龍城）長者中心合作，今次有廿八個年齡由六十五至九十幾歲長者參加，協恩中學有二十七名學生，再帶同一個屋企人做義工，由於反應熱烈，需要抽籤決定參加者，負責嘅節目包括整桔形湯圓、午宴同唱粵曲等。
有份參加活動嘅長者王寶賢（六十五歲），原來係四十幾年前嘅協恩中學畢業生，嗰日都係畢業之後第一次返母校，佢仲話見到課室老師用啲舊木枱，少女讀書時候嘅回憶都番晒嚟。佢又同八方講，覺得𠵱家啲協恩妹過份怕醜啦，唔少嘢都有屋企人幫。王婆婆話自己讀中學嘅時候，已經好獨立好主動，好多嘢自己搞掂，因為以前協恩中學嘅老師，成日教佢哋要做「堅強嘅女性」，王婆婆話希望「千禧後」嘅師妹可以主動啲喎。