去年有大批市民幫襯「健諾口腔手術及植齒中心 」，一心想整好棚靚牙，因為牙醫請辭而中伏，但呢間公司拖足四個多月，拒絕按法庭判令賠錢，經《蘋果》報道同苦主走去報警控告對方涉嫌詐騙後，健諾最終上周先肯賠錢，廿多位苦主收到票開心晒，噚日同陪佢哋開記者會嘅立法會議員梁美芬去酒樓搞慶功宴。
苦主鄔先生指出，不少中伏嘅苦主當日都係因為收到「郵寄通函」嘅宣傳單張而走去幫襯健諾，但估唔到成個集團透過成立不同公司卸責，原本只係整好棚牙，但最終搞到又要打官司又要報警，所以成班苦主誓言，以後唔會幫襯醫療集團，寧願搵番啲單頭掛牌醫生，以免個醫生又「走佬」。