港元換日圓6.5算，確係比兩年前低，同時好多酒店同貨品已經加價最少一、兩成，抵玩程度或不似預期。不過對鋼勞愛好者嚟講，原來仲有水位。
日本觀光局公佈，舊年訪日中、港旅客分別升超過八成同兩成，合共超過三百萬人，帶動酒店需求。越來越多人揀自由行，酒店加價彌補跌咗嘅旅行團生意。東京大倉酒店舊年加價8%，東京帝國酒店房價更回到海嘯前，每晚三萬日圓，成千五蚊。有網民講龍角散都加價，由十算時一盒賣五百日圓，約五十蚊；到宜家6.5算一盒就賣七百日圓，約四十五個半。即使滙價跌，只係抵銷貨品加價影響，慳到嘅未必夠食多餐飯。
不過，日本買鋼勞嘅價錢確係棧！雖然上個月尾有報道話勞力士係日本加價8%，但部份錶款仍平過香港。好多港人時不時上網分享日本買勞攻略。識窿路嘅會去東京上野龜吉、Quark同大阪嘅激安之殿堂等。多數人會去百貨公司嘅專櫃尋寶，有機會定價較日本水貨舖平兼有退稅，用銀聯咭找數仲有額外折頭，前題係記得幫張咭提高limit。
近日有網民話喺大阪百貨專櫃買到綠針GMT Master II鋼勞，退稅後約七十八萬日圓，即係五萬頭港紙，仍平過香港幾千。當然呢隻並非係Deepsea或係綠面Submariner熱炒款，又冇金勞咁保值，但旅行買到心頭好，回憶無價。
C+B
本欄逢周一刊出