廖創興家族成員廖湯慧靄嘅細佬湯文亮呢排好紅，佢投資地產多年，最近提出《細價樓三個月內爆煲論》引起市場熱烈討論，資深地產分析員林一鳴同佢唱反調，搞到湯文亮好似嬲嬲哋，日前直情開出盤口，話如果佢睇錯市，就請傳媒喺福臨門食番餐。
不過，林一鳴似乎就想盡快息事寧人，喺自己嘅facebook度回應話，唔得閒食呢餐飯，亦唔想火上加油；繼之而大笠湯文亮高帽，話非常尊重湯氏嘅分析文章，指對方嘅見解對佢好有啟發；如果湯文亮得閒嘅話，佢願意做東請湯文亮食番餐，豐儉由人咁話。
其實分析與預測，從來都係各抒己見，識英雄重英雄咪好囉。作為未上到車嘅普羅大眾，咁就當然希望湯文亮能夠估得中，等樓價下跌先至有機會入市，𠵱家啲樓價真係只能用「癲」字去形容。