美國駐港總領事夏千福上任之初，至like喺美領館facebook上載飲飲食食兼四圍捐嘅相，近排沉寂咗嘅佢少咗po相，可能因為轉咗喜好，因為美國領事館喺facebook話，千福BB喺官邸展示一批好靚嘅藝術品，主題環繞食物、水、馬等，等到訪嘅賓客共同細賞，莫非千福BB銳意開拓藝術品外交？
今次喺千福BB官邸展出嘅藝術品主要以畫作為主，有十一幅，佢喺介紹作品嘅小冊子話，希望通過藝術品，同來賓展開對話，透露自己係同華盛頓使館藝術辦公室一齊挑選呢批作品，希望展示美國同港澳之間嘅穩健關係同共同價值。
出自外交家女兒手筆
要數港人覺得親切嘅作品，相信同馬及帆船有關。其中一幅二○一三年嘅作品名為《Happy Valley Race Track》，畫緊跑馬地嘅 夜馬，係Patricia Miner-Sutherland嘅手筆，原來Patricia係一個外交家嘅女，兒時喺香港住過，難怪捕捉到快活谷之夜嘅美景。Louis J. Kaep就喺一幅無題作品中，將傳統中式帆船同到訪嘅美國航空母艦融入畫面，突出香港點解長期以來都係美國海軍至like造訪嘅港口。
講到食，肯定係唔同民族人士互相了解嘅好途徑，千福BB都話美食之中最愛中式佳餚，而港澳係搵中國美食嘅理想地。千福特別喺飯廳掛上由James Aponovich創作食物畫，當中好多都係水果，原來佢話中國人眼中水果通常都係農曆節慶吉祥禮物。
美國國務卿克里則喺小冊子嘅序中話，喺各地大使館展出作品喺外交中發揮重要作用，通常都用美國同東道主嘅當代藝術品，希望作品既展示美國包容性，亦與各地人民培育相互尊重的關係。
李八方
mailto:[email protected]