啱啱過去情人節，夜咗少少由市區返新界，call台冇車，想搵架的士肯載都難，勉強喺街野生捕獲一架，司機一聽地點面有難色，全程司機面黑。
類似情況，唔單止農曆年假期會持續，實際上每個住新界嘅人，每逢禮拜五六日出夜街都會面對。
市區的唔肯載入新界，最少有兩個原因，第一係短加長減，長途司機已經唔肯載，空車回程更蝕機會成本；第二係牌價急升，車租貴，每秒都要賺盡，租車司機覺得長途新界客浪費時間。
另外，新界樓價急升，少數癲價成交，令絕大部份現有業主水鬼升城隍，財富效應下，追求更方便嘅點對點交通，需求極大，供應滿足唔到。
科技，例如滴滴快的、Uber等可能解決咗買賣matching嘅問題，但係好似樓市咁，問題只能從供應着手。香港政府接受唔到Uber呢類創新科技，引入私家車同的士爭，最方便方法就係改變遊戲規則，用現有資源去滿足需求，容許新界綠的接市區回程的士。
方法一可以係市區各區設站畀綠的等客，類似現有紅的過海站，增加綠的營業地點；方法二就係綠的入新界只准預約，例如電話或用app，唔可以街邊兜客，驚引致塞車甚至乎可以限制晚上十時後先可以畀綠的入市區。
的士變樓價升輔助品
的士牌升幅唔會差得過樓太多。二○○九年至今，樓市升咗一點四倍；的士牌都升咗八成，賣六百九十萬元一個。的士係完全冇新供應。但係每要求增發牌，政府一定拎塞車係擋箭牌，最後益咗大量持牌嘅車行。
如果純粹是怕塞車，而唔係怕咗業界，可以考慮一命換一命，小巴牌曾經係貴過的士，到今日小巴牌價只值五百一十三萬元，連新界的士牌價五百三十一萬都不如。
價格上反映小巴生意難撈，小巴周街佔領泊車亦反映吉車太多。政府可以用市價收番一個小巴牌，然後拍賣一個新嘅市區的士牌，車輛數目冇變。
新界樓癲價，的士就係新界樓價上升嘅輔助品，解決咗部份因樓價升而搬入新界嘅民生問題，就係夜咗返屋企，搭的士可以快啲到。而家問題唔係唔畀錢，而係冇供應，市區的士司機唔肯載，明嘅，無謂強人所難，但係政府應該容許其他人做！
最後，小巴唔係點對點，冇得同的士爭；港鐵（066）版圖越擴越大，長途亦都難競爭，只能夠賺駁腳錢，會係鐵路優先政策最先犧牲品。
所以隻進智公交（077）只會一年比一年難撈，現市值3.01億元，所謂殼價都四億，投資價值只餘下賣殼。
高明
https://www.facebook.com/BigRiceTea
本欄逢周一刊出