一位銀行經理K君自紐約回港，探望九十歲的母親，預備逗留半年以上，因此有時間走訪各位舊同學，舊朋友，舊同事飲吓茶，傾吓偈。
K君與左丁山係中學同學，相識多年，本以為佢只係高一班，點知呢日在上海總會午飯閒談往事，先知道佢會考畢業時，左丁山先至讀完中一，相距幾年，根本無從在學校認識，都係佢好記性，佢話：「我地在中環相遇認識嘅，當時我在Manny Hanny。你同我嘅三位年青同事Johnson Fu，Edward Lau，Peter Au相熟，唔知在邊個場合見到，介紹我倆相識吖嗎。」哎吔，Manny Hanny喎，係老鬼先至記得係邊間銀行嘅啫，呢間銀行中文譯做漢華實業銀行，英文名係Manufacturers Hanover，80年代後期與美華銀行（Chemical Bank）合併，冇咗個名，美華後來又與大通銀行（Chase Manhattan）合併，冇咗個名，大通卒之在21世紀之初與摩根合併，四銀行併為一間嘅銀行就係J. P. Morgan Chase，稱摩根大通。K君由港華做到美華，再做到大通，卒之去咗紐約，選擇退休後再受聘於中資銀行做合規及反洗錢顧問。呢日中午氣溫只有十六度，佢就係着住一件短袖T恤，印上Association of Anti-Money Laundering嘅標誌，佢嘅數十年銀行生涯就係在Operations（營運）部門渡過嘅，正是長做長有，銀行不斷改朝換代，佢話終保住飯碗，當年爭位做前線貸款主任，外匯交易員，市務推廣副總裁等等，早已給不斷嘅銀行合併巨浪沖走咗，無影無蹤。
金融發展局發表人力資源小組報告，話香港未來數年人才不足，供求有落差：銀行金融界，亟需訓練人才。與K君吃午飯之日，遇到金發局人力資源小組召集人倪以理，同佢講份報告，佢話小組訪問幾十間金融機構，得到嘅資料係新入行大學畢業生大多數唔願做Operations，要做前線，故此日常營運部門，尤其是合規、風險管理專才最為缺乏人選。左丁山笑言，幾十年來都係咁嘅啦，香港之成為金融中心，自1970年左右起步，嗰陣時美資大行開始每年請trainee（即梁錦松、馬時亨一代），咪又係個個爭住做貸款主任，唔肯做會計、核數及信貸部（即今日之風險管理）嘅啦，不過今天監管機構有太多管控，製造大量職位，業界疲於奔命，人手更加緊張啫。