雖然創科局撥款拉布戰暫時打完，但八方估唔到建制同泛民嘅拉布戰，可以打到去港台錄影廠。噚日港台節目《議事論事》錄影新年特輯，代表建制派嘅工業界林大輝同工聯會麥美娟，正面迎戰泛民工黨何秀蘭以及公民黨陳家洛。
四個人一開始先禮後兵，互送新年禮物。林大輝同麥美娟先向泛民送上「山草藥五花茶」，希望幫泛民「清熱解毒，唔好亂噏」；何秀蘭與陳家洛亦非省油燈，回贈對方一罐「老藥桔」，希望建制派「潤吓喉」，下年講嘢可以溫柔啲同埋講多啲道理。
到正式埋牙，何秀蘭先讚林大輝幫手拉布，林大輝就撐話自己係「建制正氣派」，只係是其是非其非。麥美娟話港人想一人一票選特首，泛民有票數優勢「驚乜嘢」，陳家洛即刻用入閘難還擊，提醒「騙徒手法層出不窮」，要香港人睇清楚唔好俾人呃。見到幾位高手拳來腳往，主持人柳俊江拿拿臨打圓場，由五個五歲嘅小朋友講出新年願望：「要車有車，要樓有樓，人人開心選特首。」