昨日王祖藍和李亞男大婚，於婚禮上祖藍除了感激外父外母對李亞男悉心栽培，將女兒教導得近乎完美，之後祖藍係咁喊，續道:「都多謝你哋對我嘅所有包容，我哋來自兩個好唔同文化嘅地方，多謝你包容我，你哋講上海話我唔識聽，請你哋放心，點都好，你哋教到佢咁好時，唔使擔心我會唔會傷害佢，我根本唔捨得去傷害佢。」
之後祖藍仲特別提到，因病早逝的父親。祖藍續道:「呢間教堂對我嚟講好特別，我信主，由一個衰仔，慢慢去變好，喺呢度，我爸爸有事(喊)，所有呢度嘅牧師弟兄姊妹陪我行過呢段路。」
「我受洗喺呢度，今（昨）日我結婚，我喺呢度。13年前佢哋見證我受洗時，我哋仲可以一家人一齊，我今（昨）日仍然相信，我爸爸係同我一齊(喊)， 我知道天上面有兩位爸爸睇住我，所以阿嫲多謝你，你生咗個好好嘅仔，而佢又再生到個好好嘅仔；跟住係我媽咪，籌備婚禮時，佢都受我好多句，佢冇出過一句聲，係佢體諒我嘅忙同脾氣，我想大家畀啲掌聲我媽媽。」場面相當感人！
