Sunday Fever:田徑男女最純情 - 馬啟仁

Sunday Fever:田徑男女最純情 - 馬啟仁

一年一度嘅學界田徑,入場同睇電視嘅捧場人頭隨時多過本地波。睇波好多時俾大家見識到人世間嘅陰暗面,任何一場波梗有好多是非賽後慢慢傾;田徑就相反嘞,好鬼正面好鬼純情,世界一片光明。
人人都會盡力幫自己學校打氣,亦有個別學校非常大方,每當附近學校有好成績,佢哋都會嗌番句恭喜xxx;被恭喜嘅學校通常開頭都唔識反應,直到miss或者阿sir提醒先至嚟番句多謝xxx,然後大家一輪掌聲,真係幾warm㗎!不過通常主動恭喜人嘅都係男校多,可能男仔係主動啲嘅!
球迷對於球員失準表現差,通常都會粗獷回應一個單字以示不滿。奇怪,田徑場上真係好乾淨喎,就算包艇返終點,同學們都會送上愛的鼓勵,人間有情。星級跑友係好charm嘅,一人掛三個牌真係型過韓星,之但係一個人點叻都唔會攞到至高榮譽嘅全場乜乜乜。球場有英雄主義,球員隨時大過球隊;田徑都有,但最多人嗌嘅名永遠都係母校,唔係個人。
球場邊總有一班係忽然球迷,用睇娛樂版追星嘅態度去追球隊。支持愛隊就好似搵女朋友咁,受唔住引誘就始終有機會貨比貨,一日未結婚都有機會呻自己原來揀錯;支持母校又唔同,冇幾多仔女會諗住可以揀過個阿媽啩。
跑步仲有樣嘢好,快就係快,慢就係慢。除咗偶爾出現嘅叮噹馬頭要影相分勝負之外,基本上唔會有幾多人為成份,加埋唔會有符碌波或者烏龍波,田徑場上教仔真係容易好多──想成功就要苦幹,冇捷徑可言。之不過可能同大世界有啲代溝嘞,因為大人嘅世界,其實好鬼多擺烏龍同死好命。
學界賽有好多畢業多年嘅師兄師姐,個個打晒呔着晒高踭鞋,都專程喺百忙之中嚟捧場。睇見大家一張張滄桑臉容,竟然都流露出好天真嘅笑容,我先明白學界田徑原來可以幫大家洗滌心靈,毋忘初衷,一陣咁多啦,功效媲美廣告入面嘅芬蘭浴。
KEYMAN
節目主持