仲想同大家拜個早年，點知執筆時見到羅馬球員着住件「柒牌男裝」，球衣心口四個簡體字左至右寫住「拜个早年」，字體非常肉酸，而兩位model正好係迪羅斯同尼恩高蘭，救命！今晚對帕爾馬場比賽，仲會全隊波着出嚟，何其壯觀（我已經決定非理性落注對家帕爾馬）。見到呢件衫真係連隔夜飯都嘔埋，但內地人當然接受啦；當大家見到新界各處已經淪為水貨區，仲要見到歐洲球隊都淪陷，真係好想落去沙田「鳩嗚」。
講番啲開心嘢，今個禮拜嘅主角當然係曼聯。曼聯近期狀態一般，當然需要「特訓」一下，結果就流出咗某曼聯球員嘅廁格交歡片，地點聽聞係夜總會，仲要話係國際級球星；可惜片段只限曼聯球員瘋傳，大家無奈無緣一睹英姿，欣賞下另類「射術」。小弟當然第一時間問吓身邊朋友，正好有位填詞人係「獌狗」（唔開名喇），睇佢有冇咩心水。佢話最緊要睇呢兩個禮拜球員啲狀態，受呢類醜聞困擾，一定會甩甩漏漏，粉絲一定睇到；而雲高爾當然會畀出事球員出場，因為突然缺席太過欲蓋彌彰，之後佢推理應該係「天使」迪馬利亞。而我就估係肥仔朗尼，皆因佢已經係資深玩家，召妓偷食傳交射皆精。
睇番外國盤，頭三位呼聲最高乃基斯史摩寧、勞基梳爾同朗尼。不過，曼聯樹大常招歪風，贊奴沙同香川上年都有玩裸聊，領隊又點樣控制到？
梁栢堅
填詞人+彩池人