網隊主場巴克萊中心上周五舉行咗新秀挑戰賽，為明星周末揭開序幕。由今季新人王A域堅斯（Andrew Wiggins）帶領嘅國際隊，結果就以121:112贏咗主場嘅美國隊；全場輕鬆射入廿二分嘅狀元爺，賽後順理成章當選MVP（圖）。佢嘅美國籍木狼隊友拿維（Zach LaVine）雖然輸波，都好興致咁幫佢擦靚個獎座齊齊happy吓。拿維今朝會喺相同場地亮相參加入樽大賽；睇吓係咪又由大熱門勝出，再多一位木狼球員攞獎。（now635台今日9:00am起直播）
花絮︰拿維銀色戰鞋閃爆全場
NBA明星賽除咗球星較技，亦都係各大籃球品牌大戰，上周五場新秀對抗賽，各小將都着住All-Star版波鞋應戰，最搶鏡就係木狼後衞拿維對銀色「一剔」Foamposite One（圖），當年呢對Foamposite One係魔術後衞P夏達威（Penny Hardaway），售價已經千五蚊港紙，如果一剔復刻呢對銀色版就肯定炒到天價。雖然只有較少球員着三間鞋比賽，不過其中一個A域堅斯就拎到MVP，真係貴精不貴多。
花絮︰大帝做CP3「副手」
喺明星周末進行得如火如荼之際，NBA球員工會上周五進行咗投票，一致通過由「大帝」勒邦占士（LeBron James、左）做工會嘅副主席，以後同老友兼現任主席基斯保羅（Chris Paul）拍住上，齊齊為球員發聲。尤其係下季完結之後，比賽嘅電視轉播權以天文數字計，大帝嘅目標就係要幫球員爭取肥約；有兩位大牌同時出面做代表梗係好，但啲球會班主就應該唔多like喇。
花絮︰比華利曾被女伴狠撇
今年有份玩明星周末派對嘅球星，為咗娛樂球迷要犧牲情人節，但相信冇人慘得過火箭控衞比華利（Patrick Beverley、圖）；呢位專追索女嘅防守硬漢，原來都經歷過同自己講Happy Valentine's Day to me嘅日子。有記者問佢嘅「飛佛」浪漫時刻，佢嘅答案竟然係某年情人節，當時約咗個女仔一齊睇戲，點知未散場對方就走咗佬。不過比華利𠵱家咁出名，相信有大把靚女爭住向佢投懷送抱啦。
識睇，一定係睇足英台【英波Live】：
http://soccer.appledaily.com
http://bit.ly/engballlive