獅子山學會行政總監王弼不久前辭去行政總監職位，改任為董事，暫由孫柏文署理行政總監一職，孫柏文以前係大肥仔，自從因飲醉在家跌倒咬到條脷之後，痛下決心減肥，成日到馬會游水，日子有功，現在已變成瘦仔孫，成個外形唔同晒，依家孭上獅子山學會行政總監一職，應該唔會感受到壓力而瘦下去啩。
王弼無職一身輕，經常去旅行收風，去完尼泊爾之後，前個禮拜又去咗北京，到中關村考察。尼泊爾係窮地方，不過有一股神秘氣氛，加上係爬山基地，世界攀山豪傑，皆欲登上珠穆朗瑪峯（西方稱額菲爾士峯），故此遊客不絕，王弼話：「我並非爬山英雄，去一次就夠咯，西方朋友成日問去過加德滿都未，去過就係趁過潮流，唔算落後吖嗎。」
北京就唔同，大把嘢聽，王弼係自由市場信徒，不相信政府干預，聽聞中關村係北京「矽谷」，於是特登由北京朋友安排，成日在中關村飲咖啡，與人閒談，了解情況。據佢探訪所得，中關村以前係書店街，現在書店已被咖啡室取代，不少年輕人、創業者手持電腦、iPad，坐在咖啡店吹水「收風」，分享最新意念，亦有創業基金，個人投資者穿插其間搵刁，全無政府官員插手安排甚麼甚麼。點解咁多咖啡室呢？有錢可賺咩？非也，朋友告知王弼，一啲已「上岸」嘅大人物，科網大戶，如小米雷軍等人，直情就係咖啡店經營者，不在乎賺蝕，只為要維持一眾年青人「蒲點」，呢啲大戶間中亦有出現，親自落區收風，聽吓最新科技趨勢，鍾意就投資一兩球美金玩玩吓。王弼話，現時中關村年青人有任何投資項目，要銀紙支持，一日之內隨時可集資兩三百萬美元，項目可以即刻上馬，形同科技投資孵化站（incubator），大家都知道，只要不談政治，唔講意識型態，只談科技控監，中關村啲人員唔會加入嚟嘅。香港有無資格照炒中關村？王弼話一時之間難以建立，或者如果有科技投資大哥不計賺蝕，在接近大學嘅工業區設立「中關村式」嘅咖啡室街，可以試一試，但如果香港係要設立一個創新科技局嚟推動，由政府官員主導，必然係浪費金錢時間，仲有一點，如果香港發展出來嘅新技術，不能攻入大陸市場，好難搵到投資者泵水咯！