今日情人節，大家諗到同另一半去邊度羅曼蒂克未呢？八方就覺得，只要情人喺身邊，真係有乜慶祝活動都一樣咁sweet。之但係海洋公園嘅大熊貓樂樂今個情人節就慘啲嘞，因為同佢朝夕相對嘅盈盈，噚日凌晨飛返「娘家」四川。吓，乜佢哋情海翻波咩？大家唔使為呢對「小情熊」擔心，其實盈盈只係返鄉下配種「求子」。
學習交配行為
其實樂樂同盈盈都係中央喺二○○七年為慶祝香港回歸十周年，送畀特區政府嘅禮物。但嚟港七年半後，盈盈卻未能「夢熊有兆」。海洋公園都好心急，希望佢哋有下一代，所以都將樂樂盈盈加入全國大熊貓繁殖計劃。
原來盈盈喺噚日凌晨，掉低樂樂坐飛機去咗四川都江堰嘅中國保護大熊貓研究中心、即係佢嘅出生地，為配種做好準備，海洋公園都派出動物護理同獸醫團隊陪住。
中心喺網頁圖文並茂，話盈盈最初返娘家都有啲緊張，基本情況正常。盈盈會先喺中心進行一個月嘅隔離防疫，呢段時間正好係大熊貓嘅發情期，之後會送去雅安碧峰峽基地配種。如果盈盈呢次得咗，就會返香港待產。
據知中心考慮緊，到底係用樂樂嘅精子抑或其他大熊貓嘅精液進行人工授孕，定係直情畀盈盈直接同其他大熊貓自然交配好呢？而喺中心呢段時間，盈盈就要學習交配行為，提高自然交配能力。
如果個仔唔係自己嘅，樂樂會唔會唔鍾意做「後父」呢？中心副主任李德生向傳媒透露：「大熊貓是獨居動物，野外大熊貓小崽都會跟着媽媽，幾乎不會有一家三口其樂融融的場面。」佢仲話呀，盈盈樂樂之前都係各自居住箒，所以唔使擔心樂樂孤家寡人唔開心喎。
李八方
mailto:[email protected]