維園年宵噚日開鑼！白鴿黨今年可能因禍得福喇，事關佢哋早前喺內地訂造咗批「689廁紙」諗住喺年宵賣，點知成批貨被內地當局查封咗，損失咗兩萬幾蚊訂金。但佢哋靈機一動，借689個女齊昕近日嘅旺盛人氣金句再創作，製作咗四千條「I'm Just毛巾」，準備喺年宵攤檔力挽狂瀾。主席劉慧卿噚日拍住黃碧雲同林卓廷親自示範，用呢條以齊昕觸發創作靈感嘅毛巾，鬥抹走污糟嘢689。
支聯會攤檔今年就推出六色民主女神像應市，仲有新款六四Tee，由兩位「Top Model」李卓人同何俊仁親自着上身演繹，卻被取笑係新嘅「耆英hehe」組合，周永康同岑敖暉想唔想佢哋做接班人？何俊仁話，希望攤檔可以幫支聯會籌多啲錢，用嚟物色更大更合適嘅六四紀念館。
限量香蕉雨傘熱賣
公民黨攤位亦推出一系列同雨傘運動有關嘅產品，最受歡迎嘅一定係香蕉雨傘，因為現場有習近平紙板舉吓舉吓把香蕉雨傘幫手做宣傳。咩話？得一千五百把咋？手快有、手慢冇，大家快啲去搶呀，主席余若薇今年繼續坐陣幫市民寫揮春。