【現代愛情故事】
【本報訊】總戲言「初戀感覺返晒嚟！」初戀甜蜜，令人艷羨，但是否就如童話故事，步入教堂，從此過着幸福快樂生活？金融人康錦麟與中學初戀女友，經歷移民分手、失業負資產，早產的女兒，挽救了婚姻，三離三合，千帆過盡，還是覺得你最好。
記者：呂麗嬋
要定性康錦麟（Alan）這個人的工作不容易，人生上半場，他是執業會計師、開過桌球室，二千年科網熱時，甚至做過半個IT人；人生下半場，他是金融機構高層、兼職講師，最新的身份是健身教練，只因與太太Cindy，相約以半年為限，操fit身形拍親蜜照，紀念相識三十一周年，「放上facebook，好震動！」他大笑。走進Alan位於太古城的家，到處貼滿倆口子的熱辣靚相，十分冤氣。
火麒麟周身癮，但對愛情，這個熱愛馬拉松的幽默光頭男卻很專一。人生走了一圈，身邊的她，仍是中二暑假那個一見鍾情的鄰校女神，「我哋分開過三次，仲可以走埋一齊，點可以唔珍惜？」Alan的愛情故事，其實很八十年代。
因一套戲分開
聖約瑟仔遇上聖心妹，和尚寺鬥師姑庵，相識在暑假，「跟堂哥出去玩，一見到就有好感」。那是中二暑假，橋唔怕舊，佯稱有教科書未買，相約心上人單獨見面。
「有次約咗睇戲，係李察基爾嘅《美國舞男》，嗰時未有三級制，情節大膽，睇完戲出嚟，好尷尬」。怕誤會又不敢解釋，剛萌芽的愛情，竟因一套電影觸礁。「到咗中五會考，佢問借mock卷，大家因為咁又約出嚟」。因小誤會而分開，十六歲的暑假，又走在一起，還計劃雙雙到澳洲升學。
遭移民潮拆散
「已有學校收，點知佢屋企申請咗十年嘅美國簽證，同一時間批咗」。八十年代香港掀起移民潮，就像無數被時代拆散了的小情侶，在互聯網不普及的年代，魚雁往來，「幾日一封信，只一年，就一大叠」。揚揚手中的信，他一臉得戚。就像電影《甜蜜蜜》的情節，這些情信是他的命根。三十年來總帶在身邊。Alan記得，一九八八年的情人節，小女友以譚詠麟十一首情歌歌名，串燒成情信，寄給他。
「嗰時係譚詠麟、張國榮最紅嘅年代，佢清唱晒信入面啲歌，用卡式帶寄嚟澳洲，一晚聽咗十幾次」。熱戀男女，有情飲水飽，但現實的人生，卻不能永遠停留在感動的那一個晚上，儲了一年錢飛到美國，分手收場，「喺美國，佢要照顧埋父母，成熟得好快，反而我仲好溫室」。步伐不一、埋怨對方沒體諒處境。
負資產致分居
那次分手，一別八年，各自另有所愛，再無見面。「直至九五年回港，先知佢年年仲有寄聖誕卡畀我父母，佢哋去美國旅行，又會招呼佢哋」。想起前塵往事，單身的他，相約食飯，沒幾個月，又走在一起。這次拍拖兩年便結婚，遇正九七樓市高峯;，九七年六月以五百多萬，買了薄扶林一個六百呎的單位，與無數在那個時空上了車的港人一樣，成了負資產。「層樓月供二萬，加息後變三萬八，好吃力，惟有租出去，搬返屋企住」。
生活逼人，在銀行從事環球股票投資的太太，每日朝九晚十一，Alan的生意又瀕倒閉。兩個明明相愛的人，又漸行漸遠。「唔想父母擔心，各自搬咗出去分開住，每星期約埋樓下等，一齊返屋企食飯」。
奇怪的關係，維持了一年多，一場黑雨，分居太太到他家避雨留宿，餘情未了，發生了性關係，太太意外懷孕。「嗰時，經濟上、感情上，好多問題未解決，心情好複雜」。那是○二年十月，港人身陷負資產的年代，禍不單行的是，懷孕四個月的太太，被驗出患上妊娠毒血症，「BB在母體互相排斥，蛋白尿、高血壓，BB唔長胎，嚴重者太太和BB都有性命危險」。
面對人生最大的一個關，他說，反而豁然開朗，「喺生死面前，好多嘢變得唔再重要」。尋訪名醫，每天往醫院跑，「BB出世前公司倒閉，失業咗一年，但嗰一年，係我人生最重要嘅一年」。重新學習體諒對方，一齊面對問題，「這些年，大家都變咗好多，好在係變得越嚟越好」。丈夫在說她總在聽，Cindy甜甜的說。千帆過盡，走過情人節鋪下的漫天玫瑰花瓣，原來，愛情才真正落地生根。
